![](http://teremanter.com/sites/default/files/styles/large/public/multimedia/images/2023/10/captura_de_pantalla_2023-10-19_a_las_19.57.03.png?itok=BKFFI-9-)
O Consorcio de Santiago e a Editora Alvarellos presentaron este xoves no Centro Internacional de Prensa de Galicia o libro 'Gárgolas de Compostela', unha edición trilingüe en galego, castelán e inglés, escrito por Benxamín Vázquez e que contén fotografías de Xaime Cortizo. Esta guía pertence á biblioteca de Divulgación Xacobea do Consorcio.
Á presentación, ademais dos dous autores, acudiron a presidenta do Consorcio de Santiago e alcaldesa da cidade, Goretti Sanmartín; a xerente do Consorcio, Belén Hernández; o responsable de publicacións do Consorcio, Juan Conde, e o editor, Henrique Alvarellos.
Segundo Benxamín Vázquez, "Santiago de Compostela é quizais a cidade europea con maior densidade de gárgolas". Desas "máscaras pétreas", tal e como son definidas, "hai máis de 300, e nesta guía selecciónanse 30 das máis singulares, nunha ollada nova e moi sorprende desta capital", indica.
As gárgolas detalladas non seguían ningún patrón particular. "Estas non retratan a realidade, nin pretenden ningunha catequese nin sermón, pois aínda que os canteiros recorran aos modelos do bestiario medieval, daquela xa non tiñan a significación moralizante, nin achegaban as mensaxes bíblicas do tempo anterior", tal e como relata Vázquez.
O autor chega á conclusión de que parte destas gárgolas eran froito do entretemento, ademais de caprichos dos canteiros: "os artífices desas pezas divertíanse tallando bestas, que perderan o seu simbolismo inicial; ou ben facendo na pedra caricaturas da xente, hoxe en día descoñecidas; ou ben lembrando vellos mitos; ou ben asomando as canles mellor ornamentadas e máis atraentes, nas alturas máis inaccesibles".
Na guía, cada unha destas gárgolas vén indicada coa súa situación, clasificación, información e descrición, acompañada por diversas imaxes ilustrativas delas, obras do fotógrafo Xaime Cortizo. Todas son descritas nos tres idiomas nos que se edita a publicación.
Sobre os autores
Benxamín Vázquez é xornalista e escritor, con pasado en diversos xornais e en televisión. No ano 94 publicou para o Consorcio de Santiago o folleto titulado Gorgeos de gárgolas, verdadeiro antecedente, totalmente pioneiro, desta guía que agora ve a luz. Tamén é autor da novela Cando soñar é canso (2003).
Pola súa banda, Xaime Cortizo é un dos artistas composteláns que máis ten retratado a capital de Galicia. Leva máis de quince anos como fotógrafo profesional e tamén traballa no eido da comunicación visual e do márketing.